05-Sanctoral mai

die 1 maii

In festo

sancti Iosephi opificis

Beátus omnis qui timet Dóminum, qui ámbulat in viis eius. Labóres mánuum tuárum manducábis, beátus es, et bene tibi erit, allelúia.

Rerum cónditor, Deus, qui legem labóris humáno géneri statuísti, concéde propítius, ut, sancti Ioseph exémplo et patrocínio, ópera perficiámus quae praécipis, et praémia consequámur quae promíttis. Per Dóminum.

Ad libitum

Léctio libri Génesis

Ait Deus :

«Faciámus hóminem ad imáginem et similitúdinem nostram ; et praesint píscibus maris et volatílibus caeli et béstiis universaéque terrae omníque réptili, quod movétur in terra».

Et creávit Deus hóminem ad imáginem suam ; ad imáginem Dei creávit illum ; másculum et féminam creávit eos.

Benedixítque illis Deus et ait illis Deus : «Créscite et multiplicámini et repléte terram et subícite eam et dominámini píscibus maris et volatílibus caeli et univérsis animántibus, quae movéntur super terram».

Dixítque Deus : «Ecce dedi vobis omnem herbam afferéntem semen super terram et univérsa ligna, quae habent in semetípsis fructum ligni portántem seméntem, ut sint vobis in escam et cunctis animántibus terrae omníque vólucri caeli et univérsis, quae movéntur in terra et in quibus est ánima vivens, omnem herbam viréntem ad vescéndum».

Et factum est ita. Vidítque Deus cuncta, quae fecit, et ecce erant valde bona. Et factum est véspere et mane, dies sextus.

Igitur perfécti sunt caeli et terra et omnis exércitus eórum. Complevítque Deus die séptimo opus suum, quod fécerat, et requiévit die séptimo ab univérso ópere, quod patrárat. Et benedíxit Deus diéi séptimo et sanctificávit illum, quia in ipso requiéverat ab omni ópere suo, quod creávit Deus, ut fáceret.

Léctio Epístulae beáti Pauli apóstoli

ad Colossénses

Fratres :

Super ómnia haec : caritátem, quod est vínculum perfectiónis. Et pax Christi dominétur in córdibus vestris, ad quam et vocáti estis in uno córpore. Et grati estóte.

Omne, quodcúmque fácitis in verbo aut in ópere, ómnia in nómine Dómini Iesu grátias agéntes Deo et Patri per ipsum.

Quodcúmque fácitis, ex ánimo operámini sicut Dómino et non homínibus, sciéntes quod a Dómino accipiétis retributiónem hereditátis. Dómino Christo servíte.

Priúsquam montes nasceréntur aut gignerétur terra et orbis,

a saéculo et usque in saéculum tu es Deus.

Redúcis hóminem in púlverem ;

et dixísti : «Revertímini, fílii hóminum».

Quóniam mille anni ante óculos tuos

tamquam dies hestérna, quae praetériit,

et custódia in nocte.

Dinumeráre dies nostros sic doce nos,

ut inducámus cor ad sapiéntiam.

Convértere, Dómine, úsquequo ?

Et deprecábilis esto super servos tuos.

Reple nos mane misericórdia tua,

et exsultábimus et delectábimur ómnibus diébus nostris.

Appáreat servis tuis opus tuum

et decor tuus fíliis eórum.

Allelúia, allelúia.

Benedíctus Dóminus die cotídie ; portábit nos Deus salutárium nostrórum.

Allelúia.

Léctio sancti Evangélii secúndum Matthaéum

In illo témpore :

Véniens Iesus in pátriam suam, docébat eos in synagógis eórum, ita ut miraréntur et dícerent : «Unde huic sapiéntia haec et virtútes ? Nonne hic est fabri fílius ? Nonne mater eius dícitur María, et fratres eius Iacóbus et Ioseph et Simon et Iudas ? Et soróres eius nonne omnes apud nos sunt ? Unde ergo huic ómnia ista ? » Et scandalizabántur in eo.

Iesus autem dixit eis : «Non est prophéta sine honóre nisi in pátria et in domo sua».

Et non fecit ibi virtútes multas propter incredulitátem illórum.

Fons totíus misericórdiae, Deus, réspice ad múnera nostra, quae in commemoratióne beáti Ioseph maiestáti tuae deférimus, et concéde propítius, ut obláta dona fiant praesídia supplicántium. Per Christum.

Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus :  Et te in festivitáte beáti Ioseph débitis magnificáre praecóniis, benedícere et praedicáre.

Qui et vir iustus, a te Deíparae Vírgini Sponsus est datus, et fidélis servus ac prudens, super Famíliam tuam est constitútus, ut Unigénitum tuum, Sancti Spíritus obumbratióne concéptum, patérna vice custodíret, Iesum Christum Dóminum nostrum.

Per quem maiestátem tuam laudant Angeli, adórant Dominatiónes, tremunt Potestátes. Caeli caelorúmque Virtútes, ac beáta Séraphim, sócia exsultatióne concélebrant. Cum quibus et nostras voces ut admítti iúbeas, deprecámur, súpplici confessióne dicéntes :

Sanctus…

- Omne, quodcúmque fácitis in verbo aut in ópere, ómnia in nómine Dómini Iesu grátias agéntes Deo, allelúia.

Caeléstibus, Dómine, pasti delíciis, súpplices te rogámus, ut, exémplo beáti Ioseph, caritátis tuae in córdibus nostris testimónia geréntes, perpétuae pacis fructu iúgiter perfruámur. Per Christum.

die 2 maii

In festo

sancti Athanasii

Omnípotens sempitérne Deus, qui beátum Athanásium epíscopum divinitátis Fílii tui propugnatórem exímium suscitásti, concéde propítius, ut, eius doctrína et protectióne gaudéntes, in tui cognitióne et amóre sine intermissióne crescámus. Per Dóminum.

Léctio Epístulae primae beáti Ioánnis apóstoli

Caríssimi :

Omnis, qui credit quóniam Iesus est Christus, ex Deo natus est ; et omnis, qui díligit Deum qui génuit, díligit et eum qui natus est ex eo.

In hoc cognóscimus quóniam dilígimus natos Dei, cum Deum diligámus et mandáta eius faciámus.

Haec est enim cáritas Dei, ut mandáta eius servémus ; et mandáta eius grávia non sunt, quóniam omne, quod natum est ex Deo, vincit mundum ; et haec est victória, quae vincit mundum : fides nostra.

Quis est qui vincit mundum, nisi qui credit quóniam Iesus est Fílius Dei ?

Spera in Dómino et fac bonitátem,

et inhabitábis terram et pascéris in fide.

Delectáre in Dómino, et dabit tibi petitiónes cordis tui.

Commítte Dómino viam tuam et spera in eo,

et ipse fáciet ;

Et edúcet quasi lumen iustítiam tuam

et iudícium tuum tamquam merídiem.

Os iusti meditábitur sapiéntiam,

et lingua eius loquétur iudícium ;

lex Dei eius in corde ipsíus,

et non vacillábunt gressus eius.

Allelúia, allelúia.

Beáti, qui persecutiónem patiúntur propter iustítiam, quóniam ipsórum est regnum caelórum.

Allelúia.

Léctio sancti Evangélii secúndum Matthaéum

In illo témpore : Dixit Iesus discípulis suis :

«Eritis ódio ómnibus propter nomen meum ; qui autem perseveráverit in finem, hic salvus erit. Cum autem persequéntur vos in civitáte ista, fugite in aliam ; amen enim dico vobis : Non consummabitis civitátes Israel, donec véniat Fílius hóminis.

Non est discípulus super magístrum nec servus super dóminum suum. Súfficit discípulo, ut sit sicut magíster eius, et servus sicut dóminus eius».

die 3 maii

In festo

sanctorum Philíppi et Iacobi

Isti sunt viri sancti, quos elégit Dóminus in caritáte non ficta, et dedit illis glóriam sempitérnam, allelúia.

Deus, qui nos ánnua apostolórum Philíppi et Iacóbi festivitáte laetíficas, da nobis, ipsórum précibus, in Unigéniti tui passióne et resurrectióne consórtium, ut ad perpétuam tui visiónem perveníre mereámur. Per Dóminum.

Léctio Epístulae prióris beáti Pauli apóstoli

ad Corínthios

Notum vobis fácio, fratres, evangélium, quod evangelizávi vobis, quod et accepístis, in quo et statis, per quod et salvámini, qua ratióne evangelizáverim vobis, si tenétis, nisi si frustra credidístis.

Trádidi enim vobis in primis, quod et accépi, quóniam Christus mórtuus est pro peccátis nostris secúndum Scriptúras et quia sepúltus est et quia suscitátus est tértia die secúndum Scriptúras et quia visus est Cephae et post haec Duódecim ; deínde visus est plus quam quingéntis frátribus simul, ex quibus plures manent usque adhuc, quidam autem dormiérunt ; deínde visus est Iacóbo, deínde apóstolis ómnibus ; novíssime autem ómnium, tamquam abortívo, visus est et mihi.

Caeli enárrant glóriam Dei,

et ópera mánuum eius annúntiat firmaméntum.

Dies diéi erúctat verbum,

et nox nocti índicat sciéntiam.

Non sunt loquélae neque sermónes,

quorum non intellegántur voces :

In omnem  terram exívit sonus eórum

et in fines orbis terrae verba eórum.

Allelúia, allelúia.

Ego sum via et véritas et vita, dicit Dóminus ; Philíppe, qui vidit me, vidit Patrem.

Allelúia.

Léctio sancti Evangélii secúndum Ioánnem

In illo témpore :

Dicit Iesus ad Thomam : «Ego sum via et véritas et vita ; nemo venit ad Patrem nisi per me. Si cognovístis me, et Patrem meum útique cognoscétis ; et ámodo cognóscitis eum et vidístis eum».

Dicit ei Philíppus : «Dómine, osténde nobis Patrem, et súfficit nobis».

Dicit ei Iesus : «Tanto témpore vobíscum sum, et non cognovístis me, Philíppe ? Qui vidit me, vidit Patrem.

Quómodo tu dicis : “Osténde nobis Patrem?” Non credis quia ego in Patre, et Pater in me est ? Verba, quae ego loquor vobis, a meípso non loquor ; Pater autem in me manens facit ópera sua.

Crédite mihi quia ego in Patre, et Pater in me est ; alióquin propter ópera ipsa crédite.

Amen, amen dico vobis : Qui credit in me, ópera, quae ego fácio, et ipse fáciet et maióra horum fáciet, quia ego ad Patrem vado. Et quodcúmque petiéritis in nómine meo, hoc fáciam, ut glorificétur Pater in Fílio ; si quid petiéritis me in nómine meo, ego fáciam».

Súscipe, Dómine, múnera quae pro apostolórum Philíppi et Iacóbi festivitáte deférimus, et immaculátam nobis religiónem mundámque largíre. Per Christum.

Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus :

Qui gregem tuum, Pastor aetérne, non déseris, sed per beátos Apóstolos contínua protectióne custódis, ut iísdem rectóribus gubernétur, quos Fílii tui vicários eídem contulísti praeésse pastóres.

Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :

Sanctus…

- Dómine, osténde nobis Patrem, et súfficit nobis. Philíppe, qui vidit me, vidit Patrem meum, allelúia.

Purífica, quaésumus, Dómine, mentes nostras per haec sancta quae súmpsimus, ut, cum apóstolis Philíppo et Iacóbo te in Fílio contemplántes, vitam habére mereámur aetérnam. Per Christum.

die 12 maii

In festo

sanctorum Nerei et Achillei

Praesta, quaésumus, omnípotens Deus, ut, qui gloriósos mártyres Neréum et Achilléum fortes in sua confessióne cognóvimus, pios apud te in nostra intercessióne sentiámus. Per Dóminum.

Léctio libri Apocalýpsis beáti Ioánnis apóstoli

Ego Ioánnes vidi turbam magnam, quam dinumeráre nemo póterat, ex ómnibus géntibus et tríbubus et pópulis et linguis stantes ante thronum et in conspéctu Agni, amícti stolis albis, et palmae in mánibus eórum ; et clamant voce magna dicéntes : «Salus Deo nostro, qui sedet super thronum, et Agno».

Et omnes ángeli stabant in circúitu throni et seniórum et quáttuor animálium, et cecidérunt in conspéctu throni in fácies suas et adoravérunt Deum dicéntes : «Amen ! Benedíctio et glória et sapiéntia et gratiárum áctio et honor et virtus et fortitúdo Deo nostro in saécula saeculórum. Amen».

Et respóndit unus de senióribus dicens mihi : «Hi qui amícti sunt stolis albis, qui sunt et unde venérunt ?».

Et dixi illi : «Dómine mi, tu scis».

Et dixit mihi : «Hi sunt qui véniunt de tribulatióne magna et lavérunt stolas suas et dealbavérunt eas in sánguine Agni. Ideo sunt ante thronum Dei et sérviunt ei die ac nocte in templo eius ; et, qui sedet in throno, habitábit super illos.

Non esúrient ámplius neque sítient ámplius, nec cadet super illos sol neque ullus aestus, quóniam Agnus, qui in médio throni est, pascet illos et dedúcet eos ad vitae fontes aquárum, et abstérget Deus omnem lácrimam ex óculis eórum».

Nisi quia Dóminus erat in nobis,

cum exsúrgerent hómines in nos :

forte vivos deglutíssent nos,

cum irascerétur furor eórum in nos.

Fórsitan aqua absorbuísset nos,

torrens pertransísset ánimam nostram ;

fórsitan pertransíssent ánimam nostram

aquae intumescéntes.

Láqueus contrítus est,

et nos erépti sumus.

Adiutórium nostrum in nómine Dómini,

qui fecit caelum et terram.

Allelúia, allelúia.

Beáti, qui persecutiónem patiúntur propter iustítiam, quóniam ipsórum est regnum caelórum.

Allelúia.

Léctio sancti Evangélii secúndum Matthaéum

In illo témpore :

Dixit Iesus Apóstolis suis : «Cavéte ab homínibus ; tradent enim vos in concíliis, et in synagógis suis flagellábunt vos ; et ad praésides et ad reges ducémini propter me in testimónium illis et géntibus.

Cum autem tradent vos, nolíte cogitáre quómodo aut quid loquámini ; dábitur enim vobis in illa hora quid loquámini.

Non enim vos estis, qui loquímini, sed Spíritus Patris vestri, qui lóquitur in vobis.

Tradet autem frater fratrem in mortem, et pater fílium ; et insúrgent fílii in paréntes et morte eos affícient. Et éritis ódio ómnibus propter nomen meum ; qui autem perseveráverit in finem, hic salvus erit».

die 12 maii

In festo

sancti Pancratii

Laetétur Ecclésia tua, Deus, beáti Pancrátii mártyris confísa suffrágiis, atque, eius précibus gloriósis, et devóta permáneat, et secúra consístat. Per Dóminum.

Léctio libri Apocalýpsis beáti Ioánnis apóstoli

Ego Ioánnes audívi quasi vocem magnam turbae multae in caelo dicéntium :

«Allelúia ! Salus et glória et virtus Deo nostro !».

Et vox de throno exívit dicens :

«Laudem dícite Deo nostro, omnes servi eius et qui timétis eum, pusílli et magni !».

Et audívi quasi vocem turbae magnae et sicut vocem aquárum multárum et sicut vocem tonítruum magnórum dicéntium : «Allelúia, quóniam regnávit Dóminus, Deus noster omnípotens. Gaudeámus et exsultémus et demus glóriam ei, quia venérunt núptiae Agni, et uxor eius praeparávit se. Et datum est illi, ut coopériat se býssino splendénti mundo : býssinum enim iustificatiónes sunt sanctórum».

Et dixit mihi :

«Scribe : Beáti, qui ad cenam nuptiárum Agni vocáti sunt !».

Bénedic, ánima mea, Dómino,

et ómnia, quae intra me sunt, nómini sancto eius.

Bénedic, ánima mea, Dómino

et noli oblivísci omnes retributiónes eius.

Qui propitiátur ómnibus iniquitátibus tuis,

qui sanat omnes infirmitátes tuas ;

Qui rédimit de intéritu vitam tuam,

qui corónat te in misericórdia et miseratiónibus.

Miserátor et miséricors Dóminus,

longánimis et multae misericórdiae.

Non in perpétuum conténdet neque in aetérnum irascétur.

Quómodo miserétur pater filiórum,

misértus est Dóminus timéntibus se.

Quóniam ipse cognóvit figméntum nostrum,

recordátus est quóniam pulvis sumus.

Misericórdia autem Dómini ab aetérno

et usque in aetérnum super timéntes eum ;

Et iustítia illíus in fílios filiórum,

in eos, qui servant testaméntum eius.

Allelúia, allelúia.

Benedíctus es, Pater, Dómine caeli et terrae, quia mystéria regni párvulis revelásti.

Allelúia.

Léctio sancti Evangélii secúndum Matthaéum

In illo témpore respóndens Iesus dixit : «Confíteor tibi, Pater, Dómine caeli et terrae, quia abscondísti haec a sapiéntibus et prudéntibus et revelásti ea párvulis. Ita, Pater, quóniam sic fuit plácitum ante te.

Omnia mihi trádita sunt a Patre meo ; et nemo novit Fílium nisi Pater, neque Patrem quis novit nisi Fílius et cui volúerit Fílius reveláre.

Veníte ad me, omnes, qui laborátis et oneráti estis, et ego refíciam vos.

Tóllite iugum meum super vos et díscite a me, quia mitis sum et húmilis corde, et inveniétis réquiem animábus vestris. Iugum enim meum suáve et onus meum leve est».

die 13 maii

In Apparitione

Sanctissimae Virginis Mariae in Fatima

Deus, qui Genetrícem Fílii tui Matrem quoque nostram constituísti, concéde nobis, ut, in paeniténtia et oratióne pro mundi salúte perseverántes, in dies valeámus regnum Christi efficácius promovére. Per Dóminum.

Léctio libri Isaíae prophétae

Sciétur in géntibus semen eórum, et germen eórum in médio populórum ; omnes, qui víderint eos, cognóscent illos, quia isti sunt semen, cui benedíxit Dóminus.

Gaudens gaudébo in Dómino, et exsultábit ánima mea in Deo meo, quia índuit me vestiméntis salútis et induménto iustítiae circúmdedit me, quasi sponsum decorátum coróna et quasi sponsam ornátam monílibus suis.

Sicut enim terra profert germen suum, et sicut hortus semen suum gérminat, sic Dóminus Deus germinábit iustítiam et laudem coram univérsis géntibus.

Audi, fília, et vide et inclína aurem tuam

et oblivíscere pópulum tuum et domum patris tui ;

et concupíscet rex spéciem tuam.

Quóniam ipse est dóminus tuus, et adóra eum.

Gloriósa nimis fília regis intrínsecus,

textúris aúreis circumamícta.

In véstibus variegátis adducétur regi ;

vírgines post eam, próximae eius, afferúntur tibi.

Afferúntur in laetítia et exsultatióne,

adducúntur in domum regis.

Pro pátribus tuis erunt tibi fílii ;

constítues eos príncipes super omnem terram.

Allelúia, allelúia.

Felix es, sacra Virgo María, et omni laude digníssima, quia ex te ortus est sol iustítiae, Christus Deus noster.

Allelúia.

Léctio sancti Evangélii secúndum Lucam

In illo témpore :

Extóllens vocem quaedam múlier de turba dixit Iesu :

«Beátus venter, qui te portávit, et úbera, quae suxísti !».

At ille dixit :

«Quinímmo beáti, qui áudiunt verbum Dei et custódiunt !».

die 14 maii

In festo

sancti Matthiae

Non vos me elegístis, sed ego elégi vos, ut eátis, et fructum afferátis, et fructus vester máneat (allelúia).

Deus, qui beátum Matthíam Apostolórum collégio sociásti, eius nobis interventióne concéde, ut, dilectiónis tuae sorte gaudéntes, cum eléctis numerári mereámur. Per Dóminum.

Léctio Actuum Apostolórum

In diébus illis exsúrgens Petrus in médio fratrum dixit - erat autem turba hóminum simul fere centum vigínti - : «Viri fratres, oportébat impléri Scriptúram, quam praedíxit Spíritus Sanctus per os David de Iuda, qui fuit dux eórum, qui comprehendérunt Iesum, qui connumerátus erat in nobis et sortítus est sortem ministérii huius.

Scriptum est enim in libro Psalmórum : “Fiat commorátio eius desérta, et non sit qui inhábitet in ea”, et : “Episcopátum eius accípiat alius”.

Opórtet ergo ex his viris, qui nobíscum congregáti erant in omni témpore, quo intrávit et exívit inter nos Dóminus Iesus, incípiens a baptísmate Ioánnis usque in diem, qua assúmptus est a nobis, testem resurrectiónis eius nobíscum fíeri unum ex istis».

Et statuérunt duos, Ioseph, qui vocabátur Bársabas, qui cognominátus est Iustus, et Matthíam.

Et orántes dixérunt : «Tu, Dómine, qui corda nosti ómnium, osténde quem elégeris ex his duóbus unum accípere locum ministérii huius et apostolátus, de quo praevaricátus est Iudas, ut abíret in locum suum».

Et dedérunt sortes eis, et cécidit sors super Matthíam, et annumerátus est cum úndecim apóstolis.

Laudáte, púeri Dómini,

laudáte nomen Dómini.

Sit nomen Dómini benedíctum

ex hoc nunc et usque in saéculum.

A solis ortu usque ad occásum

laudábile nomen Dómini.

Excélsus super omnes gentes Dóminus,

super caelos glória eius.

Quis sicut Dóminus Deus noster,

qui in altis hábitat

et se inclínat, ut respíciat

in caelum et in terram ?

Súscitans de terra ínopem,

de stércore érigens páuperem,

ut cóllocet eum cum princípibus,

cum princípibus pópuli sui.

Allelúia, allelúia.

Ego vos elégi de mundo, ut eátis et fructum afferátis, et fructus vester máneat, dicit Dóminus.

Allelúia.

Léctio sancti Evangélii secúndum Ioánnem

In illo témpore :

Dixit Iesus discípulis suis : «Sicut diléxit me Pater, et ego diléxi vos ; manéte in dilectióne mea. Si praecépta mea servavéritis, manébitis in dilectióne mea, sicut ego Patris mei praecépta servávi et máneo in eius dilectióne. Haec locútus sum vobis, ut gáudium meum in vobis sit, et gáudium vestrum impleátur.

Hoc est praecéptum meum, ut diligátis ínvicem, sicut diléxi vos ; maiórem hac dilectiónem nemo habet, ut ánimam suam quis ponat pro amícis suis.

Vos amíci mei estis, si fecéritis, quae ego praecípio vobis. Iam non dico vos servos, quia servus nescit quid facit dóminus eius ; vos autem dixi amícos, quia ómnia, quae audívi a Patre meo, nota feci vobis.

Non vos me elegístis, sed ego elégi vos et pósui vos, ut vos eátis et fructum afferátis, et fructus vester máneat, ut quodcúmque petiéritis Patrem in nómine meo, det vobis.

Haec mando vobis, ut diligátis ínvicem».

Ecclésiae tuae, Dómine, múnera pro festo beáti Matthíae reverénter obláta suscípias, et per ea nos grátiae tuae virtúte confírma. Per Christum.

Vere dignum et iustum est, aequum et salutáre, nos tibi semper et ubíque grátias ágere : Dómine, sancte Pater, omnípotens aetérne Deus :

Qui gregem tuum, Pastor aetérne, non déseris, sed per beátos Apóstolos contínua protectióne custódis, ut iísdem rectóribus gubernétur, quos Fílii tui vicários eídem contulísti praeésse pastóres.

Et ídeo cum Angelis et Archángelis, cum Thronis et Dominatiónibus, cumque omni milítia caeléstis exércitus, hymnum glóriae tuae cánimus, sine fine dicéntes :

Sanctus…

- Hoc est praecéptum meum, ut diligátis ínvicem, sicut diléxi vos, dicit Dóminus (allelúia).

Famíliam tuam, Dómine, divínis ne cesses replére munéribus, ut, beáto Matthía pro nobis intercedénte, in partem sortis sanctórum in lúmine nos dignéris accípere. Per Christum.

die 18 maii

In festo

sancti Ioannis I

Deus, fidélium remunerátor animárum, qui hunc diem beáti Ioánnis papae martýrio consecrásti, exáudi preces pópuli tui, et praesta, ut qui eius mérita venerámur, fídei constántiam imitémur. Per Dóminum.

Léctio libri Apocalýpsis beáti Ioánnis apóstoli

Haec dicit Amen, testis fidélis et verus, princípium creatúrae Dei : «Ecce sto ad óstium et pulso. Si quis audíerit vocem meam et aperúerit mihi iánuam, intrábo ad illum et cenábo cum illo, et ipse mecum.

Qui vícerit, dabo ei sedére mecum in throno meo, sicut et ego vici et sedi cum Patre meo in throno eius.

Qui habet aurem, áudiat quid Spíritus dicat ecclésiis».

Dóminus pascit me, et nihil mihi déerit :

in páscuis viréntibus me collocávit,

super aquas quiétis edúxit me,

ánimam meam refécit.

Dedúxit me super sémitas iustítiae propter nomen suum.

Nam et si ambulávero in valle umbrae mortis,

non timébo mala, quóniam tu mecum es.

Virga tua et báculus tuus,

ipsa me consoláta sunt.

Parásti in conspéctu meo mensam

advérsus eos, qui tríbulant me ;

impinguásti in óleo caput meum,

et calix meus redúndat.

Etenim benígnitas et misericórdia subsequéntur me

ómnibus diébus vitae meae,

et inhabitábo in domo Dómini

in longitúdinem diérum.

Allelúia, allelúia.

Vos dixi amícos, dicit Dóminus, quia ómnia, quae audívi a Patre meo nota feci vobis.

Allelúia.

Léctio sancti Evangélii secúndum Lucam

In illo témpore :

Facta est conténtio inter Apóstolos, quis eórum viderétur esse maior.

Dixit autem eis Iesus : «Reges géntium dominántur eórum et, qui potestátem habent super eos, benéfici vocántur. Vos autem non sic, sed qui maior est in vobis, fiat sicut iúnior ; et, qui praecéssor est, sicut ministrátor. Nam quis maior est : qui recúmbit an qui minístrat ? Nonne qui recúmbit ? Ego autem in médio vestrum sum sicut qui minístrat.

Vos autem estis qui permansístis mecum in tentatiónibus meis ; et ego dispóno vobis, sicut dispósuit mihi Pater meus regnum, ut edátis et bibátis super mensam meam in regno meo, et sedeátis super thronos iudicántes duódecim tribus Israel».

die 20 maii

In festo

sancti Bernardini Senensis

Deus, qui beáto Bernardíno presbýtero sancti nóminis Iesu amórem exímium tribuísti, eius méritis precibúsque concéde, ut spíritus nos semper tuae dilectiónis accéndat. Per Dóminum.

Léctio Actuum Apostolórum

In diébus illis : Replétus Spíritu Sancto Petrus dixit :

«Príncipes pópuli et senióres, si nos hódie diiudicámur in benefácto hóminis infírmi, in quo iste salvus factus est, notum sit ómnibus vobis et omni plebi Israel quia in nómine Iesu Christi Nazaréni, quem vos crucifixístis, quem Deus suscitávit a mórtuis, in hoc iste astat coram vobis sanus.

Hic est lapis, qui reprobátus est a vobis aedificatóribus, qui factus est in caput ánguli. Et non est in álio áliquo salus ; nec enim nomen áliud est sub caelo datum in homínibus, in quo opórtet nos salvos fíeri».

Exspéctans exspectávi Dóminum,

et inténdit mihi.

Et immísit in os meum cánticum novum,

carmen Deo nostro.

Sacrifícium et oblatiónem noluísti,

aures autem fodísti mihi.

Holocáustum et pro peccáto non postulásti,

tunc dixi : «Ecce vénio.

In volúmine libri scriptum est de me.

Fácere voluntátem tuam, Deus meus, vólui ;

et lex tua in praecórdiis meis».

Annuntiávi iustítiam tuam in ecclésia magna ;

ecce lábia mea non prohibébo, Dómine, tu scisti.

Allelúia, allelúia.

Ego sum lux mundi, dicit Dóminus ; qui séquitur me, habébit lumen vitae.

Allelúia.

Léctio sancti Evangélii secúndum Lucam

In illo témpore :

Eúntibus Iesu et discípulis suis in via, dixit quidam ad illum : «Sequar te, quocúmque íeris».

Et ait illi Iesus : «Vulpes fóveas habent et vólucres caeli nidos, Fílius autem hóminis non habet, ubi caput réclinet».

Ait autem ad álterum : «Séquere me».

Ille autem dixit : «Dómine, permítte mihi primum ire et sepelire patrem meum».

Dixítque ei Iesus : «Sine, ut mórtui sepéliant mórtuos suos ; tu autem vade, annúntia regnum Dei».

Et ait alter : «Sequar te, Dómine, sed primum permítte mihi renuntiáre his, quae domi sunt».

Ait ad illum Iesus : «Nemo mittens manum suam in arátrum et aspíciens retro, aptus est regno Dei».

die 21 maii

In festo

sanctorum Christophori Magallanes et Sociorum

Omnípotens aetérne Deus, qui beátos Christóphorum, presbýterum, et sócios Christo Regi usque ad martýrium fidéles effecísti, eórum intercessióne nobis concéde, ut, in verae fídei perseverántes confessióne amóris tui mandátis semper inhaerére valeámus. Per Dóminum.

Léctio libri Apocalýpsis beáti Ioánnis apóstoli

Ego Ioánnes vidi turbam magnam, quam dinumeráre nemo póterat, ex ómnibus géntibus et tríbubus et pópulis et linguis stantes ante thronum et in conspéctu Agni, amícti stolis albis, et palmae in mánibus eórum ; et clamant voce magna dicéntes : «Salus Deo nostro, qui sedet super thronum, et Agno».

Et omnes ángeli stabant in circúitu throni et seniórum et quáttuor animálium, et cecidérunt in conspéctu throni in fácies suas et adoravérunt Deum dicéntes : «Amen ! Benedíctio et glória et sapiéntia et gratiárum áctio et honor et virtus et fortitúdo Deo nostro in saécula saeculórum. Amen».

Et respóndit unus de senióribus dicens mihi : «Hi qui amícti sunt stolis albis, qui sunt et unde venérunt ?».

Et dixi illi : «Dómine mi, tu scis».

Et dixit mihi : «Hi sunt qui véniunt de tribulatióne magna et lavérunt stolas suas et dealbavérunt eas in sánguine Agni. Ideo sunt ante thronum Dei et sérviunt ei die ac nocte in templo eius ; et, qui sedet in throno, habitábit super illos.

Non esúrient ámplius neque sítient ámplius, nec cadet super illos sol neque ullus aestus, quóniam Agnus, qui in médio throni est, pascet illos et dedúcet eos ad vitae fontes aquárum, et abstérget Deus omnem lácrimam ex óculis eórum».

Benedícam Dóminum in omni témpore,

semper laus eius in ore meo.

In Dómino gloriábitur ánima mea,

áudiant mansuéti et laeténtur.

Magnificáte Dóminum mecum,

et exaltémus nomen eius in idípsum.

Exquisívi Dóminum, et exaudívit me

et ex ómnibus terróribus meis erípuit me.

Respícite ad eum, et illuminámini

et fácies vestrae non confundéntur.

Iste pauper clamávit, et Dóminus exaudívit eum

et de ómnibus tribulatiónibus eius salvávit eum.

Vallábit ángelus Dómini in circúitu timéntes eum

et erípiet eos.

Gustáte et vidéte quóniam suávis est Dóminus ;

beátus vir, qui sperat in eo.

Allelúia, allelúia.

Beáti, qui persecutiónem patiúntur propter iustítiam, quóniam ipsórum est regnum caelórum.

Allelúia.

Léctio sancti Evangélii secúndum Ioánnem

In illo témpore :

Dixit Iesus discípulis suis : «Amen, amen dico vobis : Nisi granum fruménti cadens in terram mórtuum fúerit, ipsum solum manet ; si autem mórtuum fúerit, multum fructum affert.

Qui amat ánimam suam, perdit eam ; et, qui odit ánimam suam in hoc mundo, in vitam aetérnam custódiet eam.

Si quis mihi minístrat, me sequátur, et ubi sum ego, illic et miníster meus erit ; si quis mihi ministráverit, honorificábit eum Pater».

die 22 maii

In festo

sanctae Ritae

Largíre nobis, quaésumus, Dómine, sapiéntiam crucis et fortitúdinem quibus beátam Ritam ditáre dignátus es, ut, in tribulatióne cum Christo patiéntes, pascháli eius mystério intímius participáre valeámus. Per Dóminum.

Léctio Epístulae beáti Pauli apóstoli

ad Philippénses

Fratres :

Gaudéte in Dómino semper. Iterum dico : Gaudéte ! Modéstia vestra nota sit ómnibus homínibus. Dóminus prope.

Nihil sollíciti sitis, sed in omni oratióne et obsecratióne cum gratiárum actióne, petitiónes vestrae innotéscant apud Deum. Et pax Dei, quae exsúperat omnem sensum, custódiet corda vestra et intellegéntias vestras in Christo Iesu.

De cétero, fratres, quaecúmque sunt vera, quaecúmque pudíca, quaecúmque iusta, quaecúmque casta, quaecúmque amabília, quaecúmque bonae famae, si qua virtus et si qua laus, haec cogitáte.

Quae et didicístis et accepístis et audístis et vidístis in me, haec ágite ; et Deus pacis erit vobíscum.

Beátus vir, qui non ábiit in consílio impiórum

et in via peccatórum non stetit

et in convéntu derisórum non sedit,

sed in lege Dómini volúntas eius,

et in lege eius meditátur die ac nocte.

Et erit tamquam lignum plantátum secus decúrsus aquárum,

quod fructum suum dabit in témpore suo ;

et fólium eius non défluet,

et ómnia, quaecúmque fáciet, prosperabúntur.

Non sic ímpii, non sic,

sed tamquam pulvis, quem próicit ventus.

Quóniam novit Dóminus viam iustórum,

et iter impiórum períbit.

Allelúia, allelúia.

Veníte ad me, omnes, qui laborátis et oneráti estis, et ego refíciam vos, dicit Dóminus.

Allelúia.

Léctio sancti Evangélii secúndum Lucam

In illo témpore : Dixit Iesus discípulis suis :

«Vobis dico, qui audítis : Dilígite inimícos vestros, bene fácite his, qui vos odérunt ; benedícite maledicéntibus vobis, oráte pro calumniántibus vos. Ei qui te pércutit in maxíllam, praebe et álteram ; et ab eo, qui aufert tibi vestiméntum, étiam túnicam noli prohibére. Omni peténti te tríbue ; et ab eo, qui aufert, quae tua sunt, ne répetas. Et prout vultis, ut fáciant vobis hómines, fácite illis simíliter.

Et si dilígitis eos, qui vos díligunt, quae vobis est grátia ? Nam et peccatóres diligéntes se díligunt. Et si bene fecéritis his, qui vobis bene fáciunt, quae vobis est grátia ? Síquidem et peccatóres idem fáciunt. Et si mútuum dedéritis his, a quibus sperátis recípere, quae vobis grátia est ? Nam et peccatóres peccatóribus fenerántur, ut recípiant aequália.

Verúmtamen dilígite inimícos vestros et bene fácite et mútuum date nihil desperántes ; et erit merces vestra multa, et éritis fílii Altíssimi, quia ipse benígnus est super ingrátos et malos. Estóte misericórdes, sicut et Pater vester miséricors est.

Et nolíte iudicáre et non iudicabímini ; et nolíte condemnáre et non condemnabímini. Dimíttite et dimittémini ; date, et dábitur vobis : mensúram bonam, confértam, coagitátam, supereffluéntem dabunt in sinum vestrum ; eádem quippe mensúra, qua mensi fuéritis, remetiétur vobis».

die 25 maii

In festo

sancti Gregorii VII

Da Ecclésiae tuae, quaésumus, Dómine, spíritum fortitúdinis zelúmque iustítiae, quibus beátum Gregórium papam claréscere voluísti, ut, iniquitátem réprobans, quaecúmque recta sunt líbera exérceat caritáte. Per Dóminum.

Léctio Actuum Apostolórum

In diébus illis :

A Miléto Paulus mittens Ephesum convocávit presbýteros ecclésiae.

Qui cum veníssent ad eum, dixit eis : «Atténdite vobis et univérso gregi, in quo vos Spíritus Sanctus pósuit epíscopos, páscere ecclésiam Dei, quam acquisívit sánguine suo. Ego scio quóniam intrábunt post discessiónem meam lupi graves in vos non parcéntes gregi, et ex vobis ipsis exsúrgent viri loquéntes pervérsa, ut ábstrahant discípulos post se.

Propter quod vigiláte memória retinéntes quóniam per triénnium nocte et die non cessávi cum lácrimis monens unumquémque vestrum.

Et nunc comméndo vos Deo et verbo grátiae ipsíus, qui potens est aedificáre et dare hereditátem in sanctificátis ómnibus».

Et cum haec dixísset, pósitis génibus suis, cum ómnibus illis orávit.

Dixit Dóminus Dómino meo : «Sede a dextris meis,

donec ponam inimícos tuos scabéllum pedum tuórum».

Virgam poténtiae tuae emíttet Dóminus ex Sion :

domináre in médio inimicórum tuórum.

Tecum principátus in die virtútis tuae, in splendóribus sanctis,

ex útero ante lucíferum génui te.

Iurávit Dóminus et non paenitébit eum :

«Tu es sacérdos in aetérnum secúndum órdinem Melchísedech».

Allelúia, allelúia.

Veníte post me, dicit Dóminus, et fáciam vos fíeri piscatóres hóminum.

Allelúia.

Léctio sancti Evangélii secúndum Matthaéum

In illo témpore :

Venit Iesus in partes Caesaréae Philíppi et interrogábat discípulos suos dicens : «Quem dicunt hómines esse Fílium hóminis ?».

At illi dixérunt  : «Alii Ioánnem Baptístam, álii autem Elíam, álii vero Ieremíam, aut unum ex prophétis».

Dicit illis : «Vos autem quem me esse dícitis ?».

Respóndens Simon Petrus dixit : «Tu es Christus Fílius Dei vivi».

Respóndens autem Iesus dixit ei : «Beátus es, Simon Barióna, quia caro et sanguis non revelávit tibi, sed Pater meus, qui in caelis est.

Et ego dico tibi : Tu es Petrus, et super hanc petram aedificábo Ecclésiam meam ; et portae ínferi non praevalébunt advérsus eam. Tibi dabo claves regni caelórum ; et quodcúmque ligáveris super terram, erit ligátum in caelis, et quodcúmque sólveris super terram, erit solútum in caelis».

die 25 maii

In festo

sancti Bedae Venerabilis

Deus, qui Ecclésiam tuam beáti Bedae presbýteri eruditióne claríficas, fámulis tuis concéde propítius, et eius semper illustrári sapiéntia, et méritis adiuvári. Per Dóminum.

Léctio Epístulae prióris beáti Pauli apóstoli

ad Corínthios

Spíritus ómnia scrutátur, étiam profúnda Dei. Quis enim scit hóminum, quae sint hóminis, nisi spíritus hóminis, qui in ipso est ? Ita et, quae Dei sunt, nemo cognóvit nisi Spíritus Dei.

Nos autem non spíritum mundi accépimus, sed Spíritum, qui ex Deo est, ut sciámus, quae a Deo donáta sunt nobis ; quae et lóquimur non in doctis humánae sapiéntiae, sed in doctis Spíritus verbis, spiritálibus spiritália comparántes.

Animális autem homo non pércipit, quae sunt Spíritus Dei, stultítia enim sunt illi, et non potest intellégere, quia spiritáliter examinántur ; spiritális autem iúdicat ómnia, et ipse a némine iudicátur. Quis enim cognóvit sensum Dómini, qui ínstruat eum ?

Nos autem sensum Christi habémus.

In quo mundábit adulescéntior viam suam ?

In custodiéndo sermónes tuos.

In toto corde meo exquisívi te,

ne erráre me fácias a praecéptis tuis.

In corde meo abscóndi elóquia tua,

ut non peccem tibi.

Benedíctus es, Dómine ;

doce me iustificatiónes tuas.

In lábiis meis

numerávi ómnia iudícia oris tui.

In via testimoniórum tuórum delectátus sum

sicut in ómnibus divítiis.

Allelúia, allelúia.

Verba tua, Dómine, spíritus et vita ; verba vitae aetérnae habes.

Allelúia.

Léctio sancti Evangélii secúndum Matthaéum

In illo témpore : Dixit Iesus Apóstolis suis :

«Non omnis, qui dicit mihi : “Dómine, Dómine”, intrábit in regnum caelórum, sed qui facit voluntátem Patris mei, qui in caelis est.

Multi dicent mihi in illa die : “Dómine, Dómine, nonne in tuo nómine prophetávimus, et in tuo nómine daemónia eiécimus, et in tuo nómine virtútes multas fécimus ?”. Et tunc confitébor illis : “Numquam novi vos ; discédite a me, qui operámini iniquitátem”.

Omnis ergo, qui audit verba mea haec et facit ea, assimilábitur viro sapiénti, qui aedificávit domum suam supra petram. Et descéndit plúvia, et venérunt flúmina, et flavérunt venti et irruérunt in domum illam, et non cécidit ; fundáta enim erat supra petram.

Et omnis, qui audit verba mea haec et non facit ea, símilis erit viro stulto, qui aedificávit domum suam supra arénam. Et descéndit plúvia, et venérunt flúmina, et flavérunt venti et irruérunt in domum illam, et cécidit, et fuit ruina eius magna».

Et factum est cum consummásset Iesus verba haec, admirabántur turbae super doctrínam eius ; erat enim docens eos sicut potestátem habens et non sicut scribae eórum.

die 25 maii

In festo

sancti Bedae Venerabilis

Deus, qui Ecclésiam tuam beáti Bedae presbýteri eruditióne claríficas, fámulis tuis concéde propítius, et eius semper illustrári sapiéntia, et méritis adiuvári. Per Dóminum.

Léctio Epístulae prióris beáti Pauli apóstoli

ad Corínthios

Spíritus ómnia scrutátur, étiam profúnda Dei. Quis enim scit hóminum, quae sint hóminis, nisi spíritus hóminis, qui in ipso est ? Ita et, quae Dei sunt, nemo cognóvit nisi Spíritus Dei.

Nos autem non spíritum mundi accépimus, sed Spíritum, qui ex Deo est, ut sciámus, quae a Deo donáta sunt nobis ; quae et lóquimur non in doctis humánae sapiéntiae, sed in doctis Spíritus verbis, spiritálibus spiritália comparántes.

Animális autem homo non pércipit, quae sunt Spíritus Dei, stultítia enim sunt illi, et non potest intellégere, quia spiritáliter examinántur ; spiritális autem iúdicat ómnia, et ipse a némine iudicátur. Quis enim cognóvit sensum Dómini, qui ínstruat eum ?

Nos autem sensum Christi habémus.

In quo mundábit adulescéntior viam suam ?

In custodiéndo sermónes tuos.

In toto corde meo exquisívi te,

ne erráre me fácias a praecéptis tuis.

In corde meo abscóndi elóquia tua,

ut non peccem tibi.

Benedíctus es, Dómine ;

doce me iustificatiónes tuas.

In lábiis meis

numerávi ómnia iudícia oris tui.

In via testimoniórum tuórum delectátus sum

sicut in ómnibus divítiis.

Allelúia, allelúia.

Verba tua, Dómine, spíritus et vita ; verba vitae aetérnae habes.

Allelúia.

Léctio sancti Evangélii secúndum Matthaéum

In illo témpore : Dixit Iesus Apóstolis suis :

«Non omnis, qui dicit mihi : “Dómine, Dómine”, intrábit in regnum caelórum, sed qui facit voluntátem Patris mei, qui in caelis est.

Multi dicent mihi in illa die : “Dómine, Dómine, nonne in tuo nómine prophetávimus, et in tuo nómine daemónia eiécimus, et in tuo nómine virtútes multas fécimus ?”. Et tunc confitébor illis : “Numquam novi vos ; discédite a me, qui operámini iniquitátem”.

Omnis ergo, qui audit verba mea haec et facit ea, assimilábitur viro sapiénti, qui aedificávit domum suam supra petram. Et descéndit plúvia, et venérunt flúmina, et flavérunt venti et irruérunt in domum illam, et non cécidit ; fundáta enim erat supra petram.

Et omnis, qui audit verba mea haec et non facit ea, símilis erit viro stulto, qui aedificávit domum suam supra arénam. Et descéndit plúvia, et venérunt flúmina, et flavérunt venti et irruérunt in domum illam, et cécidit, et fuit ruina eius magna».

Et factum est cum consummásset Iesus verba haec, admirabántur turbae super doctrínam eius ; erat enim docens eos sicut potestátem habens et non sicut scribae eórum.

die 25 maii

In festo

sanctae Magdalenae de’ Pazzi

Deus, virginitátis amátor, qui beátam Maríam Magdalénam vírginem, tuo amóre succénsam, donis caeléstibus decorásti, da ut, quam hódie venerámur, eius puritátis caritatísque imitémur exémpla. Per Dóminum.

Léctio Epístulae prióris beáti Pauli apóstoli

ad Corínthios

Fratres :

De virgínibus praecéptum Dómini non hábeo, consílium autem do, tamquam misericórdiam consecútus a Dómino ut sim fidélis. Exístimo ergo hoc bonum esse propter instántem necessitátem, quóniam bonum est hómini sic esse.

Alligátus es uxóri ? Noli quaérere solutiónem. Solútus es ab uxóre ? Noli quaérere uxórem. Si autem accéperis uxórem, non peccásti ; et si núpserit virgo, non peccávit. Tribulatiónem tamen carnis habébunt huiúsmodi, ego autem vobis parco.

Hoc ítaque dico, fratres, tempus breviátum est ; relíquum est, ut et qui habent uxóres, tamquam non habéntes sint, et qui flent, tamquam non flentes, et qui gaudent, tamquam non gaudéntes, et qui emunt, tamquam non possidéntes, et qui utúntur hoc mundo, tamquam non abuténtes ; praéterit enim figúra huius mundi».

Volo autem vos sine sollicitúdine esse.

Qui sine uxóre est, sollícitus est, quae Dómini sunt, quómodo pláceat Dómino ; qui autem cum uxóre est, sollícitus est, quae sunt mundi, quómodo pláceat uxóri, et divísus est.

Et múlier innúpta et virgo cógitat, quae Dómini sunt, ut sit sancta et córpore et spíritu ; quae autem nupta est, cógitat, quae sunt mundi, quómodo pláceat viro.

Porro hoc ad utilitátem vestram dico, non ut láqueum vobis iníciam, sed ad id quod honéstum est et ut assídue cum Dómino sitis sine distractióne.

Laudáte Dóminum de caelis,

laudáte eum in excélsis.

Laudáte eum, omnes ángeli eius,

laudáte eum, omnes virtútes eius .

Reges terrae et omnes pópuli,

príncipes et omnes iúdices terrae,

iúvenes et vírgines,

senes cum iunióribus

laudent nomen Dómini.

Magnificéntia eius super caelum et terram,

et exaltávit cornu pópuli sui.

Hymnus ómnibus sanctis eius,

fíliis Israel, pópulo, qui propínquus est ei.

Allelúia, allelúia.

Si manséritis in sermóne meo, vere discípuli mei estis et cognoscétis veritátem, dicit Dóminus.

Allelúia.

Léctio sancti Evangélii secúndum Marcum

In illo témpore :

Venit mater Iesu et fratres eius et foris stantes misérunt ad eum vocántes eum.

Et sedébat circa eum turba, et dicunt ei : «Ecce mater tua et fratres tui et soróres tuae foris quaerunt te».

Et respóndens eis ait : «Quae est mater mea et fratres mei ?».

Et circumspíciens eos, qui in circúitu eius sedébant, ait :

«Ecce mater mea et fratres mei. Qui enim fécerit voluntátem Dei, hic frater meus et soror mea et mater est».

die 26 maii

In festo

sancti Philíppi Neri

Deus, qui fidéles tibi servos sanctitátis glória sublimáre non desístis, concéde propítius, ut illo nos igne Spíritus Sanctus inflámmet, quo beáti Philíppi cor mirabíliter penetrávit. Per Dóminum.

Léctio Epístulae beáti Pauli apóstoli

ad Philippénses

Fratres :

Gaudéte in Dómino semper. Iterum dico : Gaudéte ! Modéstia vestra nota sit ómnibus homínibus. Dóminus prope.

Nihil sollíciti sitis, sed in omni oratióne et obsecratióne cum gratiárum actióne, petitiónes vestrae innotéscant apud Deum. Et pax Dei, quae exsúperat omnem sensum, custódiet corda vestra et intellegéntias vestras in Christo Iesu.

De cétero, fratres, quaecúmque sunt vera, quaecúmque pudíca, quaecúmque iusta, quaecúmque casta, quaecúmque amabília, quaecúmque bonae famae, si qua virtus et si qua laus, haec cogitáte.

Quae et didicístis et accepístis et audístis et vidístis in me, haec ágite ; et Deus pacis erit vobíscum.

Benedícam Dóminum in omni témpore,

semper laus eius in ore meo.

In Dómino gloriábitur ánima mea,

áudiant mansuéti et laeténtur.

Magnificáte Dóminum mecum,

et exaltémus nomen eius in idípsum.

Exquisívi Dóminum, et exaudívit me

et ex ómnibus terróribus meis erípuit me.

Respícite ad eum, et illuminámini

et fácies vestrae non confundéntur.

Iste pauper clamávit, et Dóminus exaudívit eum

et de ómnibus tribulatiónibus eius salvávit eum.

Vallábit ángelus Dómini in circúitu timéntes eum

et erípiet eos.

Gustáte et vidéte quóniam suávis est Dóminus ;

beátus vir, qui sperat in eo.

Timéte Dóminum, sancti eius,

quóniam non est inópia timéntibus eum.

Dívites eguérunt et esuriérunt,

inquiréntes autem Dóminum non defícient omni bono.

Allelúia, allelúia.

Manéte in dilectióne mea, dicit Dóminus ; qui manet in me, et ego in eo, hic fert fructum multum.

Allelúia.

Léctio sancti Evangélii secúndum Ioánnem

In illo témpore :

Sublevátis Iesus óculis in caelum, orávit dicens : «Pater sancte, non pro his autem rogo tantum, sed et pro eis, qui creditúri sunt per verbum eórum in me, ut omnes unum sint, sicut tu, Pater, in me et ego in te, ut et ipsi in nobis unum sint : ut mundus credat quia tu me misísti.

Et ego claritátem, quam dedísti mihi, dedi illis, ut sint unum, sicut nos unum sumus ; ego in eis, et tu in me, ut sint consummáti in unum : ut cognóscat mundus quia tu me misísti et dilexísti eos, sicut me dilexísti.

Pater, quos dedísti mihi, volo, ut ubi ego sum, et illi sint mecum, ut vídeant claritátem meam, quam dedísti mihi, quia dilexísti me ante constitutiónem mundi.

Pater iuste, et mundus te non cognóvit ; ego autem te cognóvi et hi cognovérunt quia tu me misísti, et notum feci eis nomen tuum et notum fáciam, ut diléctio, qua dilexísti me, in ipsis sit, et ego in ipsis».

Hóstiam tibi laudis offeréntes, quaésumus, Dómine, ut, beáti Philíppi exémplo, ad tui nóminis glóriam proximíque servítium hílares nos semper praestémus. Per Christum.

Caeléstibus, Dómine, pasti delíciis, quaésumus, ut, beáti Philíppi imitatióne, semper éadem, per quae veráciter vívimus, appetámus. Per Christum.

die 27 maii

In festo

sancti Augustini Cantuariensis

Deus, qui beáti Augustíni epíscopi praedicatióne Anglórum gentes ad Evangélium perduxísti, tríbue, quaésumus, ut eius labórum fructus in Ecclésia tua perénni fecunditáte persístant. Per Dóminum.

Léctio Epístulae prióris beáti Pauli apóstoli

ad Thessalonicénses

Fratres :

Fidúciam habúimus in Deo nostro loqui ad vos evangélium Dei in multa sollicitúdine.

Exhortátio enim nostra non ex erróre neque ex immundítia neque in dolo, sed sicut probáti sumus a Deo, ut crederétur nobis evangélium, ita lóquimur non quasi homínibus placéntes, sed Deo, qui probat corda nostra.

Neque enim aliquándo fúimus in sermóne adulatiónis, sicut scitis, neque sub praetéxtu avarítiae, Deus testis, nec quaeréntes ab homínibus glóriam, neque a vobis neque ab áliis, cum possémus óneri esse ut Christi apóstoli, sed facti sumus párvuli in médio vestrum, tamquam si nutrix fóveat fílios suos, ita desiderántes vos, cúpide volebámus trádere vobis non solum evangélium Dei, sed étiam ánimas nostras, quóniam caríssimi nobis facti estis.

Cantáte Dómino cánticum novum,

cantáte Dómino, omnis terra.

Cantáte Dómino, benedícite nómini eius,

annuntiáte de die in diem salutáre eius.

Annuntiáte inter gentes glóriam eius,

in ómnibus pópulis mirabília eius.

Afférte Dómino, famíliae populórum,

afférte Dómino glóriam et poténtiam,

afférte Dómino glóriam nóminis eius.

Dícite in géntibus : «Dóminus regnávit !».

Etenim corréxit orbem terrae, qui non commovébitur ;

iudicábit pópulos in aequitáte.

Allelúia, allelúia.

Ego sum pastor bonus, dicit Dóminus ; et cognósco oves meas, et cognóscunt me meae.

Allelúia.

Léctio sancti Evangélii secúndum Matthaéum

In illo témpore :

Circuíbat Iesus civitátes omnes et castélla, docens in synagógis eórum et praédicans evangélium regni et curans omnem languórem et omnem infirmitátem. Videns autem turbas, misértus est eis quia erant vexáti et iacéntes sicut oves non habéntes pastórem.

Tunc dicit discípulis suis : «Messis quidem multa, operárii autem pauci ; rogáte ergo Dóminum messis, ut mittat operários in messem suam».

die 31 maii

In Visitatione

beatae Mariae Virginis

Veníte, audíte, et narrábo, omnes qui timétis Deum, quanta fecit Dóminus ánimae meae (allelúia).

Omnípotens sempitérne Deus, qui beátam Vírginem Maríam, Fílium tuum gestántem, ad visitándam Elísabeth inspirásti, praesta, quaésumus, ut, afflánti Spirítui obsequéntes, cum ipsa te semper magnificáre possímus. Per Dóminum.

Ad libitum

Léctio libri Sophoníae prophétae

Lauda, fília Sion ; iubiláte, Israel ! Laetáre et exsúlta in omni corde, fília Ierúsalem ! Abstulit Dóminus iudícium tuum, avértit inimícos tuos ; rex Israel Dóminus in médio tui, non timébis malum ultra.

In die illa dicétur Ierúsalem : «Noli timére, Sion ; ne dissolvántur manus tuae ! Dóminus Deus tuus in médio tui, fortis ipse salvábit ; gaudébit super te in laetítia, commótus in dilectióne sua ; exsultábit super te in laude sicut in die convéntus».

Auferam  a te calamitátem, ut non ultra hábeas super ea oppróbrium.

Léctio Epístulae beáti Pauli apóstoli

ad Romános

Fratres :

Diléctio sine simulatióne. Odiéntes malum, adhaeréntes bono ; caritáte fraternitátis ínvicem diligéntes, honóre ínvicem praeveniéntes, sollicitúdine non pigri, spíritu fervéntes, Dómino serviéntes, spe gaudéntes, in tribulatióne patiéntes, oratióni instántes, necessitátibus sanctórum communicántes, hospitalitátem sectántes.

Benedícite persequéntibus : benedícite et nolíte maledícere ! Gaudére cum gaudéntibus, flere cum fléntibus. Idípsum ínvicem sentiéntes, non alta sapiéntes, sed humílibus consentiéntes.

Ecce Deus salútis meae ; fiduciáliter agam et non timébo,

quia fortitúdo mea et laus mea Dóminus,

et factus est mihi in salútem.

Et hauriétis aquas in gáudio de fóntibus salútis.

Confitémini Dómino et invocáte nomen eius,

notas fácite in pópulis adinventiónes eius ;

mementóte quóniam excélsum est nomen eius.

Cantáte Dómino, quóniam magnífice fecit,

notum sit hoc in univérsa terra.

Exsúlta et lauda, habitátio Sion,

quia magnus in médio tui Sanctus Israel.

Allelúia, allelúia.

Beáta es, Virgo María, quae credidísti, quóniam perficiéntur ea, quae dicta sunt tibi a Dómino.

Allelúia.

Léctio sancti Evangélii secúndum Lucam

Exsúrgens María in diébus illis ábiit in montána cum festinatióne in civitátem Iudae et intrávit in domum Zacharíae et salutávit Elísabeth.

Et factum est ut audívit salutatiónem Maríae Elísabeth, exsultávit infans in útero eius, et repléta est Spíritu Sancto Elísabeth et exclamávit voce magna et dixit :

«Benedícta tu inter mulíeres, et benedíctus fructus ventris tui. Et unde hoc mihi, ut véniat mater Dómini mei ad me ? Ecce enim ut facta est vox salutatiónis tuae in áuribus meis, exsultávit in gáudio infans in útero meo. Et beáta, quae crédidit, quóniam perficiéntur ea, quae dicta sunt ei a Dómino».

Et ait María :

«Magníficat ánima mea Dóminum, et exsultávit spíritus meus in Deo salvatóre meo, quia respéxit humilitátem ancíllae suae. Ecce enim ex hoc beátam me dicent omnes generatiónes, quia fecit mihi magna, qui potens est, et sanctum nomen eius, et misericórdia eius in progénies et progénies timéntibus eum.

Fecit poténtiam in bráchio suo, dispérsit supérbos mente cordis sui ; depósuit poténtes de sede et exaltávit húmiles ; esuriéntes implévit bonis et dívites dimísit inánes.

Suscépit Israel púerum suum, recordátus misericórdiae, sicut locútus est ad patres nostros, Abraham et sémini eius in saécula».

Mansit autem María cum illa quasi ménsibus tribus et revérsa est in domum suam.

Maiestáti tuae, Dómine, hoc nostrum gratum sit sacrifícium salutáre, sicut beatíssimae Unigéniti tui Matris habuísti acceptábilem caritátem. Per Christum.

Vere dignum et iustum est, aequum et salutáre, in ómnium Sanctórum provéctu te mirábilem confitéri, et potíssimum, beátae Vírginis Maríae memóriam recoléntes, cleméntiam tuam ipsíus grato magnificáre praecónio.

Vere namque in omnes terrae fines magna fecísti, ac tuam in saécula prorogásti misericórdiae largitátem, cum, ancíllae tuae humilitátem aspíciens, per eam dedísti humánae salútis auctórem, Fílium tuum, Iesum Christum, Dóminum nostrum.

Per quem maiestátem tuam adórat exércitus Angelórum, ante conspéctum tuum in aeternitáte laetántium. Cum quibus et nostras voces ut admítti iúbeas, deprecámur, sócia exsultatióne dicéntes :

Sanctus…

- Beátam me dicent omnes generatiónes, quia fecit mihi magna, qui potens est, et sanctum nomen eius (allelúia).

Magníficet te, Deus, Ecclésia tua qui tuis fecísti magna fidélibus, et, quem laténtem beátus Ioánnes cum exsultatióne praesénsit, eúndem semper vivéntem cum laetítia in hoc percípiat sacraménto. Per Christum.